ÑE'ẼPOTY PYAHU
(Dahiana ha Álepe)



Mba'éicha tamora'e
chapytu'ũ korapýre
tojeroky jajaipa 
che rembiheka yma.

Kambuchi ñe'ẽryru
topurahéi che jyva ári, 
amboy'úvo ichugui
ñe'ẽ ykua satĩ mimbi.

Chejurupyasyha'ára
ha ajuhu ñe'ẽndy,
ñe'ẽ rekove mimbi,
ñe'ẽ pyahu potyrã,
che ñe'ã ipy'aguapýne
hokypúvo che jurúpe
ñe'ẽyvoty ruvicha,
arapy pohã guasu.




ÑE'Ẽ PYTU PYAHU
(Hugo Gómez-pe)



Che ánga rovetã
ha che ñe'ã rokẽme
ombarakapu ha
oñe'ẽpotymyasãi
ko'ẽju pyahu.
Ha ipurahéi pepo
apỹire ombojeroky
ñe'ẽ pytu pyahu.

Ñe'ẽ pytu pyahu
che resáre
omboveve ipanambi
ha che ropeáre
ohaitypo imainumby.

Ñe'ẽ pytu pyahu
ne resãivagui 
che ñe'ẽpoty
oñemohemiandu,
ojeguerojera
ha oñemombe'u.

Natamora'e
ndaipytusovéi
ko ñe'ẽ pytu pyahu
che ánga rovetã
ha che ñe'ã rokẽgui.


YVYTU PYAHU II
(Rolandito ha Ruth-pe)


Ko'ẽmbyju 
ñande resáre 
ojajaipáma.

Opurahéima
guyra kampána 
ha omyasãimba 
ñane ãnguáre
ipurahéi.

Mainumbymi 
ipepo mimbíva 
ojerokýma 
ñande ruguýre.

Yvytu pyahu 
ko ñane retãme
péina ipoty, 
oñemoña ha 
okakuaa 
ipotyjera ha
ojeroky.

Ñande yvy 
porãite asýre 
ojepysóma 
ára pyahu
ha hesa'ỹire 
oguerojáma 
ko'ẽ sakã 
ko ñane retãme.

Ñandapytére 
ombarakapúma
ñe'ẽyvoty
purahéi pyahu.

Ipotypúma 
mayma yvypóra
kerayvoty.

Namóina hína
hesakãmbáva 
ko'ẽ pyahu 
ha ijyva ári
otororéma 
kóga kyrỹi
ysapy memby.

Yvytu pyahu 
ogueroko'ẽma 
ñane ñe'ẽ 
korasõ ruguáre, 
yvotyty.



KA'AGUY PYAHU
(Maikol ha Richar-pe)



Eirete sakã, 
eirete sakã
ikatu opa 
ka'aguy opárõ!

Ka'avo, ñana, 
pohãguasuete 
ñanembohorýva
jahapo'opárõ, 
yvoty opáta,
opáta eíra!

Ka'aguy hembýva 

tojeityve'ỹma.

Ñambokusuguéna

mymba ñarõite 
ñane ñe'ã nguágui.

Viru rehehápe 
tojeityve'ỹma
ñande ka'aguy, 
ñande ka'aguy.


Ñañotjoána 
yvyra ra'y
ha ñamoheñói 
ka'aguy pyahu.



PARAGUÁI PYAHU
(Aníbal Lugo-pe)


Ikatuvaerãpa 
ipyahu jey
hova jepytéva 
Paraguái retã.

Ikatuvaerãpa 
yvytu sakã
ombojeroky 
ñande poyvimi
mbohapy sa'y 
oguerojeráva.

Ñande rekovéna 
taimba'epaite,
ko'ẽju rapére 
toguata jey.

Ñane mborayhúna 
ñambohokypu.

Ikatuvaerãpa 
ñane retã réra
kuarahy resẽndi 
jaropurahéi.

Mayma tetãyguára, 
taipyahúna ára! 
Ñande rekovéna 
ñane retãmíme 
tañaikuave'ẽ
ha ñande jyva
taimba'epaite,
ko'ẽju rapére 
toguata jey.

Ikatuvaerãpa. 
E'a. Ikatuvaerã.

Ikatupaitéko.

Che poha'ãrõma.

Oñondivepána 
jaguatajoa.
Ñamohesãimi 
ko ñane retã.



YVYTU KO'Ẽ PYAHU
(Emigdio González-pe)


Hokypu jerávo 
kuarahy pyahu, 
ñane resa'ỹire
mainumby pepo
ha yvytu ko'ẽ
opuraheipa.

Yvytu vevýi 
omyasãi ñandéve 
guyra purahéi,
ka'aguy ryakuã, 
ysyry ñe'ẽ, 
kóga remiandu.

Ha piko mba'ére 
ãicha jahechárõ 
mba'e porãita
ñanemoingovéva 
aipo jaguapýta 
ha ñaimerei.

Jajetyvyróna!!! 
Ha ñamomorã
ñande rekove 
ha ñane retã.

Ñaiméva guive 
Paraguái memby 
ha ta'yrakuéra,
ñañomoirũmbána!!! 
Ha jahupimi 
mbyjaty ru'ãre 
ko ñane retã!!! 
Yvytu pepóre 
taipotyjera!!!



ÁRA PYAHU
(Lucho Cardozo-pe)


Ñaipohãnomína 
ñande pyti'a
ha hesãivehápe 
ñambohokypu
ñande pukavy, 
ñande purahéi.

Ñande niko hína 
ko tetã memby
ymáma jaikóva 
jaguerosoña
kuarahy resẽvo 
Paraguái pyahu.

Kuña, kuimba'e, 
mitã pyahu kuéra
toñemoarandu.

Topáy tetãyguára, 
Paraguái topáyma.

Touahẽ ñandéve 
kuarahy pyahu
hendive omyasãiva 
mbaraka ñe'.

Ñandati'ymi 
toipejupaitéma
yvytu pyahu 
ko'ẽju sakã,
korochirekuéra 
purahéi rory.

Tañaikũmbymíma 
oñondivepa
yvoty rykue 
he'ẽmbochyetéva,
mainumby ñoite 
oikuaaporãva
javy'ávaha 
ñane ñe'ã 
nguáre osyry jave.

Viva, viva el Paraguay!!!



TAIPYAHU KUÃIRŨ
(Karai Tito ha Ña Eulogia pe, 
50 áñoma omosusũre imborayhu)


Kuehénte vaicha 
pembohokypu
pene ñe'ã nguáre 
mborayhu pavẽ.

Pejuayhu porãgui 
peñomokuãirũ,
peteĩ ñe'ãnte 
peguerotytýi.

Hetaite ningo 
pende resami
ogueroguata 
temikotevẽ.

Heta kuarahy 
pende rekovére
ombyapajeréi 
temimbyasyeta.

Jepeve upéicha, 
urunde'ymi
pende rekoitépe 
pejepytaso.
Mborayhu poty 
ñemoñarekuéra
kogaty resãigui 
pemongakuaa.

Ha péina ko'á
pejesarekóvo
pehechakuaa 
pende rovami
ndojepysovéima 
ymaveguaréicha,
heta asyete 
pejoayhu rire.

Mokõinte va'ekue 
pende rekove,
ko'áḡa hetáma 
pene mborayhu 
imitã rokýva 
penembojegua
ha ombojajái 
pene kuãirũmi.



TANEKO'Ẽ PYAHU

 

Anive haḡua 
chéichante reiko
retyryryhápe 
ko múndo ñarõme
kena che ra'y... 
kuarahy resẽndi
eñombojaru,
eñomongeta.

Anive haua 
reiko che ra'y
reñendymokõ 
ha nde rovayva,
anive reke.

Eñemoarandúna.

Nde po mokõive 
taiko'ẽ pyahu.

Anive haḡua 
reiko tembiguái,
ndepytajeka 
ha rejehesy
ko che aikoháicha.

Néimana repáy, 
epáy che ra'y.

Eñemoarandúna 
ha nde rehae 
ko tetã porã

tokakuaave.

Ndéko ikatu,
ikatúko nde 
reñemoarandu.

Ha néi che ra'y, 
amano mboyve 
chéve hi'ãite 
rembohokypu, 
regueromyasãi
nde kerayvoty.

Epáy che ra'y.

Kuarahy resẽ 
purahéi pyahu
umi nde resa 
tohesapepa.

Néima terepáy, 
epáy che ra'y.
Eñemoarandúna, 
tane'arandu.



TAIPYAHU AGUYJEVETE 
(Angavusu ha Angamimbípe)


Aguyjevete 
ndéve kuarahy!!!
Remomimbi jajáire 
ore rekove rape
ha rehavi'u rehe 
ore pytu.

Aguyjevete 
ndéve yvytu!!!
Reipeju piro'ýre 
ore ñe'ã
rotytýi haua 
arapýre.

Aguyjevete 
ndéve yvy!!!
Remohyvatãre
ore resa
nde yvotyty, 
nde yva ha
nde eiretépe.

Aguyjevete 
ndéve ysyry!!!
Oremboy'u,
orepohãno ha 
oremongueráre.

Aguyjevete peẽme
kuarahy ha yvytu,
yvy ha ysyry!!!
Pembopotýre 
ore rekove
ymaite guive.

Aguyje, aguyjevete...

Taipyahu aguyjevete!!!



YVYTU PYAHÚPE 2


Ko'ẽmbyju ñande resápe

ojajái tetã poyvíndi
ojaitypo guyra kampána
ipurahéire ñane ãme
mainumby hovy veráva
ojeroky ñande ruguýre
yvytu pyahu imemby,
oñemoña, okakuaa
ha hokypu ipotyjera.

Ñande yvy porãitépe ipepo

jepysóma pe ára pyahu
ha hesa'ỹire ogueru ko'ẽtĩ
resakã ko tetãme uarã
ñandapytépe otytýi sapy'a
purahéi ha ñe'ẽyvoty
ipotypúma katu maymave
yvypóra remira'ãrõ.

Hesakã ko'ẽju hendive

kogaty omyasãi ysapy
péina yvytu oguerojáma,
omoko'ẽma yvoty kyrỹi asy
ñane ñe'ẽ korasõ nguáre
omondykýma hykuere ijeirapáva
ymaitéma jaipotáva
ñane retã porãitépe opukavy
ha opurahéi ha ojeroky
ha opurahéi.

Ñande reko paraguáina topáy,

topu'ã, toikove, tojajái
ha tahesãi ñande yvýpe
mayma ypykue ñe'ẽita arandu
ñambopoty ñane ánga ruguápe
akói mborayhu añete
opavave yvypóra tove toikuaa,
ko tetã rekove tohayhu.



KO'ẼJU POTY
(Eva Mansfeld rehe 
agueromandu'áva)


Yvy jára omongora, 

oñemohymbajagua,
oñemomboka ha 
oñembokuatiáramo jepe
he'i ha ohechauka haua
ha'e ha'eha yvy jára tee,
ko'ẽju poty ndikatúi 
oalambra, ndikatúi.

Yvy jára omongora,
oñemohymbajagua,
oñemomboka ha
oñembokuatiáramo jepe
he'i ha ohechauka haua
ha'e ha'eha yvy jára tee,
ko'ẽju poty ndikatúi
oalambra, ndikatúi.  



CHE REMBIPOTA


Ambyasy ahechávo
ñande arapýre
tapicha yvypóra
hyeñapymi,
hovajepyte,
hovakanguesẽ,
hesapypuku,
iñakuruchĩ
ha iñembyahýigui
ndikatúi oke
ha ityre'ỹgui
pynandi,
opívo,
ipo iñakã ári,
he'õngue ijapére
ipyahẽ soro,
ndahaperãvéi.


Kuarahy rendy,
ñasãindy mimbi,
yvyty ru'ã,
yvykua rugua,
ka'aguy hypy,
ysyry mbyte,
oikuaapaite
che remimbyasy.


Natamora'éna
oñondivepa
pohã herugua
ñambohokypu
ha ñamonguera
yvóra ñe'ã
hasy kakuaáva.

Añekũmberéi,
añendymokõ,
ajesakyty,
ajapysaka,
añetĩrupi,
ajepomoĩ
hi'ãitégui chéve
aikove aja,
amano mboyve
ahecha pe ára,
ára pyahuete,
ára porãve
vy'apavẽ ára
.



PYHARE RIRE
(Radio Nacional del Paraguay-pe)


Ojere hasýpe yvytu pyahu
ha henonderã oipeju ko'

ymáma hi'ãva oitypeipa
pyhare puku, pyhare ñarõ.

Ñane retãmíme ko'áa ramo,
ko'áḡa ikatúma jarosapukái.
Ha ñande kupy, ñande pyapy
ñapytĩsu'úva oso sapy'a.

Jandaikatuvéima avave ahẽ
oikũsãjopy ko ñane retã.
Ha'e oikuaa. Ha'e oñandu
huguýre osyrýva ha otororõva
hekotevẽmby.

Ñañe'ẽkatu, jajetyvyro
tetã ipyahúva jagueroko'.
Mborayhu meme, arandusatĩ
ñande raperãme tahokyjera.

Na'iporãvéima mayma paraguái
ñandetevoi jajoharupa.
Peteĩ ñe'ẽme jaikopámana
taipotyjera ñane angekói.

Pyhare rire ko'ẽ katuete,
ñapu'ã katu ñañemborari.
Ñande rekove topukavymi
tove tetãyguápe tombopiro'y
yvytu pyahu.



ÚPA CHE NDIVE
(Hi'arapáy ramóva ha hi'arapáytava guivépe)


Nei mitãmi, yvypóra pyahu,
mokõi tekove rokykuemi.
Porundy jasyho térã sa'imive
nde sy ryépe rire, resẽ sapy'a.

Yvytu neretũvo resapukái,
nerasẽ, reñemondýi kakuaa
aje mitãmi, yvypóra pyahu.

Anína rekyhyje che irũ mitãmi
naneñóiko reime, úpana che ndive,
nde niko hína mba'e pyahu
ha tembiecharã ko'ápe reju.

Ma'ẽmína, péva héra yvy, kóva
ysyry, amóva kuarahy, ñande

pirére omymýiva héra yvytu.

Hesekuéra ae ñande jaikove,
avei umi mymba, ka'avo, yvyra,
péva ha'e tekove, úpana chendive.

Ñañemamamína ñane retã
poyvi isa'y mbohapývape,
ñamoingovemi leõ guarani
oguapyvahína huguái yvate
igórra pytãva pokoka ykére.

Mbyja ra'ãnga yvyra rakãme
akói tojegua yvága mbytépe.
Tañambojajái oñondivete
ko ñane retã ko'ẽ pyahurã.

Upami mba'éna che ndive. 



VY'APAV
(Hi'arambotývape)


Namo kuarahy imbarakasãndi 
yvága hovýre omyasãi ñe'.
Purahéi rorýpe nemochichĩmba,
nde arambotýre nemomaitei.

Oime ysyry pira jerokýndi
ka'aguy mbytére oñemokoni.
Hembe'y mokõi yvoty porãme
nde arambotýre neñañuãmba.

Yvytu vevýi ko nde araitépe
oñesũpeh ha neretũmba.
Ñasãindy mimbi ange pyharéma
nde arambotýre nemokunu'ũ.

Hi'ãiténte chéve ko nde rekove
taipotyjera, akói tovy'a. 
Tove nde rape tahesakãmba
tereñemit mbyja purahéi.




ANGIRŨ AÑETE


Tapicha yvypóra
oguerovy'áva ne rembivy'a,
ombo'yvotýva nde kerayvoty
térã ombyasýva ne remimbyasy:
- Upévako hína angirũ añete.

Tapicha yvypóra
nembopepo, nemohetyma, 
nembohesa, nembo'apysa,
nesãmbyhy, ndeguerovy'áva:
- Upévako hína angirũ añete.

Tapicha yvypóra
nde kuarahy'ãre oñangarekóva,
oitypeipáva nde pyporesã
omohyakuãvúva nde réra akói:
- Upévako hína angirũ añete.



VOKÓINTE
(Rosa Peña ha mayma oho va'ekuépe 
oñemoarandu Kúva retãme)


Kuarahy Kúvape osva
nerenói che reindy ha reho. Iporã.

Terehomi che reindy,

tomimbíke oúvo nde pópe
iporãvéva nde kerayvoty.

Ko'ẽju toitypei nde raperã,
tohopa pytũmby, tohopa.
Ysapy ro'ysã ne ñe'ãme
tomimbi, totytýi.
Taipiro'y nde jurúpe

purahéi ko'ẽju myasãiha.

Nde symi ha nde ru,
nde ryke, nde kyvy
nde kypy'y, ne retã reheja.
Ne ko'ẽrã nerenói che reindy.
Iporã. Terehomi sapy'a.

Terehomi ha eju. Nde yvy, 
nde symi nera'ãrõta ko'ápe.

Terehomi... mba'éna... chã.

Naterejevýnte vokói.
Vokóinte... Pojavánte... Vokóinte.


NDE NIKO CHE RETà 

Nde niko che retã 
nde po yvyraguigua 
nde rete iperepáva 
niko yvyraguigua,
yvyra ha jajaipa...
Yvyraguigua nde ruguy
(ama ohasakuevogua yvyraguigua).


Yvyraguigua nde resa
(itavera yvyraguigua).
Yvyraguigua ne ñemomýi
(yvyra pehẽnguemimi).


Elvio Romero /Yegros 1926- Buenos Aires 2004/ (El cuerpo de madera)
maurolugo /Ita Mandyju - Santa Rosa Mnes. 1979.../ (Avañe'ẽme)



SANGURY RETÃ


Aropurahéita yvaga'imi
tory rerekua chereñoihague,
upépe oime ymaite guive
jerutimiéma ombarakapu.

Pyhare poty ñasãindy rendy
che táva porãgui hi'auieteve,
mokõive hikuái ojohesape
kakuaa irũnguéicha oñombojaru.

Ko'tjajái sérro ru'ãitépe
oguejy che táva ohesapepa,
ko che korasõme aḡaite peve
Sangury syry ipiro'ysã.

Yvymi porã mborayhu retãme
che symi ryépe akue chereñói,
hyakuã asyvéva mbokaja poty
upépe ñoite cheapynguajuka.

Chereñói guive jeroky mimbi
kuarahy resẽ ahecha pype,
kuehénte vaicha che rúndi apoñy
ahupi che apére che kerayvoty.

Mandyju po ty, pytã, sa'yju,
morotῖmimi panambi retã,
asapyha'ára chéve hi'ãite
ijyvy cheaty, chemokunu'ũ.


Letra: Mauro Lugo
Música: Tucho Rivera



KO'ẼJU POTY PYAHU


Ko'ẽju poty na toḡuahẽ,
toikove ñane ñe'ẽme.
Topurahéi añetegua,
tomoko'ẽ ñanangapy.


Tojeroky ñande yvýre,
tombopoty ñande guata.
Tojajái ñandapytére
ko'ẽju poty pyahu.



PYTŨMBY


Anivemo'ãma 
mymba ñarõite
ipepo pyharéva, 
ipyapẽ kysépe
ohesamombu 
ha omosaingo 
ijahy'osãgui 
ñande rekove.

Ko'ẽmbyju purahéi
tombokusugue
ñembyasy juru 
kuarahy'ã guýpe
oñemohãimbitíva.

Ta'ikusuguéma 
tukumbo jyete
ñaneñapytῖva.



KO'ẼMBYJU


Taipuru'ãsã jeramína
ko'ẽmbyju purahéi.
Ararembe topukavy, 
tojajái ko'ẽmbyju.
Pyhare pukuete
tahaposoro.

Ko'ẽmbyju purahéi
-yvóra remikotevẽ-,
emoḡuahẽmína
ne mimby purahéi,
purahéi mimbipa
ha akóinte tereime 
ore resa, orapysa, 
orangapy renyhẽte.



YVY RAPO


Hypy hypyvehápe 
toĝuahẽmi che ñe'ẽ
purahéi poty, 
ha amo huguaitépe,
toñemombaraka 
che ñe'ẽ remiandu.
Che ñe'ẽ ha yvy rapo 
toñomongeta
oñopehẽngue 
añete ramoguáicha.

Tomombe'u ojupe 
oñohembivy'a,
tohykuavo joyvy 
oñohemimbyasy,
tomosusũ jovái 
oñohembipota.



ÁRA RU'Ã


Mbyja rekohápe
na tajokuaimi
che ñe'ẽ pytu.

Ára ru'âitére 
na tamyasãimi 
che ánga ñe'ẽ.

Mimbipa retâpýre
tojajái che ñe'ẽ.

Mbyjaita ha che,
che ha mbyjaita
taha'e kõingue,
oñopehẽngue,
ára ru'ã jára.



AÑETEGUA


Che ñe'ẽ ánga tytýi
oñamindu'u añeteguáre.
Añetegua rapyta 
ikatúvare guive 
oñehendu 
purahéi ha jahe'ópe,
oñeñandu
tekove ha te'õnguépe,
ojehecha 
ára jajái ha aratirípe,
oñeikumby 
eirete ha petỹ rykuépe.
Ikatúvare guive ojehasa
térã ndojehasái 
tekove ha mano ykuápe.


JAPU


Che ñe'ẽ rekove 
oñyñýi mboyvéna
tahaimbe'emi 
che ánga kyse 
puku ha hakuáva.
Che ánga kyse
tahaimbe jovái, 
toverahendy.
Tahesyvõmi 
japu ahy'o.
Japu korasõ
tamondoromi, 
tove tambovo,
taikytῖsa'i
ha hendaguetépe
tañemitỹmi
ñe'ẽyvoty 
añeteguaite.



KUARAHYRESẼ


Pyhare membyryru
ndaipyharevéima rire,
hi'arapáy ko'ẽsoro 
ha arasy pyti'a
omokambu ñepyrũ
imembyra'ymi
hérava "kuarahyresẽ".
"Kuarahyresẽ"
otororéma rire
yvytu jyva ári,
omboy'u ijajairã.

"Kuarahyresẽ", 
nde ha'e ko'ẽmbyju
ñemoñare.
Che resa, che ñe'ẽ ha
che ñe'ã nemomorã.

 
KUARAHYREIKE

"Kuarahyreike",
kane'õ ku'ikue niko nde.
Ára kusugue
che ropea guýgui
reguéva rehóvo
mbeguekatumi.
Natamora'e ndapére 
hyku angata pohýi.
Nátamo ogue angata 
rata ko che rekove
omosununúva. 
Kane'õ syry 
ha kuarahyreike:
-Pejoguarehána 
arapy ruguáre.



TEKOVE


Mba'énipo ja'e 
ndéve tekove.
Sapy'ánte reipejúva
yvoty ryakuã memete,
ha upéicha jave chéntema 
upe ohykuereñamíva 
nde eirete resa'ỹi
tyky, chororo, syry.


Chéma katu mainumby 
térã eiru, upéicha jave,
ha cheresarái ikatuha amano.
Sapy'ánte katu reipeju
inevu raságui ñanapyngua
ohapomondoróva.


Upéicha jave, añetῖjopy
ani chepy'ajere,
ani chemberuno'õ
ha chemandu'a 
ikatuha amano.



MANO


Nde, mano, avave ndoikuaáiva
ndépa kuña, ndépa kuimba'e.


Aipójeko nde rova ra'ãnga
kuarahy'ã, ore roikovéva 
ndikatúi rohecha.


Ne ryakuãngue ndikatúi rohetũ.
Ne pumbasy ni nde jahe'o ryrýi
ndikatúi rohendu.


Mba'ete nipo aje.
Nde pepo guýpe reraháva
katu reraháma,
rejurumboty ha remosapymi
nde reipotaháicha ha 
nde reipotaha peve.


YPUKU MEMBY
(Tia Chínta Acosta Ortiz-pe)


Nde niko ha'e
Ypuku memby
che sy mokõiha
ko yvy apére.

Aguyjevete
ndéve tia Chínta
nde po,
nde resa,
nde py,
ne ñe'ã
ha nde rekovére.

Hetaite mitã
ipotyvaekue
isymi ryépe
nde rerouahẽ.

Nde rehe aénte
che ha hetave
roĝuahẽ,
roju,
roikove,
roime.

Nde niko ha'e
partéra yma
añeteguaite
nanekane'õiva
araka'eve
ha ne rembiapópe
rembojeguakáva
ko ñane retã.

Péina che ñe'ẽ
tombo'yvoty
nde pyporemi
tekove meme.

Ore ne memby
roñombyatypa
ko ñe'yvotýpe
ha roimehaguéicha
peteĩchaiténte
roguerovy'a
ha romomorã.

Nde ru Rafael,
nde sy Melitona
toime oimehápe
ko nde rekovére
tovy'asaingo.



YMAITÉMA


Ymaitéma 

niko aheka.


Aikotevẽ 

ha aipotáva

nde yvotytýpe 

oñemi

nde ykua 

satῖme 

oñapymi

nde resa, 

ne rembe, 

ne ma'ẽ

nde rekove 

jeguaka

ndarekóigui, 

nachemoirũigui

ajokuái 

ne rendápe

che ñe'ã 

purahéi

hi'ãite rehe 

chéve

amokunu'ũ 
nde jajái.